काठमाडौँ । राष्ट्रिय प्रकृति संरक्षण कोष पछिल्लो समय विभिन्न विवादका कारण बदनाम बन्दै गएको छ । कोषभित्र देखिएको बेथिति र कर्मचारी व्यवस्थापनमा हस्तक्षेपका कारण कार्यक्रम निर्देशक डा. चिरञ्जीवी पोखरेल विवादमा तानिएका छन् ।
बिज्ञापन
डा. पोखरेलको दरबन्दी अन्नपूर्ण संरक्षण क्षेत्र आयोजना (एक्याप) अन्तर्गत रहे पनि उनी २०८० साल साउनमा तीन महिनाका लागि काजमा कोषमा आएका थिए । तत्कालीन सदस्य सचिव शरदचन्द्र अधिकारीले संरक्षण क्षेत्रको भिजन पेपर तयार गर्ने र संरक्षण क्षेत्र व्यवस्थापन नियमावली २०५३ संशोधनलाई प्रभावकारी बनाउने उद्देश्यले उनलाई काजमा ल्याएका थिए । तर ती काम प्रभावकारी रूपमा अगाडि नबढेको आरोप छ ।
बिज्ञापन
कोषभित्र भने डा. पोखरेलले कर्मचारी प्रशासनमा अत्यधिक हस्तक्षेप गरिरहेको आरोप लाग्दै आएको छ । हाजिरी नियन्त्रण गर्ने, बिदा स्वीकृत गर्ने, कारबाहीमा परेका कर्मचारीलाई भ्रमण आदेश दिने तथा सरुवा भएका कर्मचारीलाई थमौती गर्ने कामसमेत उनले गर्दै आएको कर्मचारीहरूको गुनासो छ ।
एनटीएनसीमा अटेर कर्मचारीको हालीमुहाली, कोही सरुवा नटेर्ने त कोही गाडी दुरुपयोगमै मस्त
बिज्ञापन
यस्तै, सरकारले पहुँचका आधारमा प्रयोग भइरहेका सरकारी गाडी फिर्ता गर्ने अभियान चलाइरहेका बेला कोषका केही कर्मचारीले अझै सरकारी गाडी प्रयोग गरिरहेको आरोप लागेको छ ।
कोषका कर्मचारी बिदुरप्रसाद पोखरेल चैत महिनामै बिजनेस डेभलपमेन्ट शाखामा सरुवा भए पनि उनले लेखासम्बन्धी कागजात हस्तान्तरण नगरेको बताइएको छ । सरुवापछि पनि उनले बा २९ च ५१३० नम्बरको कियाको सोनेट गाडी प्रयोग गरिरहेको आरोप छ ।
त्यस्तै वरिष्ठ प्रशासनिक अधिकृत दुर्गाहरी भट्टराईले पनि पिएए २८३२ नम्बरको गाडी प्रयोग गरिरहेको बताइएको छ । नियमअनुसार उनीहरूले सरकारी गाडी सुविधा पाउने अवस्था नरहेको दाबी गरिएको छ ।
यसैबीच वरिष्ठ संरक्षण अधिकृत अम्बिकाप्रसाद खतिवडा र मधु क्षेत्रीलाई चितवन जैविक विविधता केन्द्रमा सरुवा गरिएको थियो । उनीहरूले सरुवाविरुद्ध अदालतमा रिट दायर गरेका थिए । अदालतले खटाइएको ठाउँमा जान निर्देशन दिए पनि उनीहरू हालसम्म कोषमै कार्यरत रहेको स्रोतको दाबी छ ।
राष्ट्रिय प्रकृति संरक्षण कोषमा अनुगमन, महत्वपूर्ण कागजात नियन्त्रणमा
कोषभित्र भइरहेका यस्ता गतिविधिमा डा. पोखरेलले संरक्षण गरिरहेको आरोपसमेत उठेको छ । यसले राष्ट्रिय प्रकृति संरक्षण कोषभित्रको प्रशासनिक अवस्था थप विवादित बन्दै गएको कर्मचारीहरू बताउँछन्।
